ଗାଁ ଇତିହାସ (ଆମ ଗାଁ ଆମ ଜୀବନ)

ଗାଁ ଇତିହାସ / ଆମ ଗାଁ ଆମ ଜୀବନ / Our Village, Our Life

ଆମ ଗାଁ ଆମ ଜୀବନ ହେଉଛି ୧୯୯୪ ମସିହାରୁ ଆରମ୍ଭ ହୋଇଥିବା ଏକ ଜୀବନ୍ତ ଗାଁ ଇତିହାସ ସଂଗ୍ରହ ଅଭିଯାନ। ଏହି କାର୍ଯ୍ୟକ୍ରମ ମାଧ୍ୟମରେ ଯୁବକ – ଯୁବତୀ ଓ  ଛାତ୍ରଛାତ୍ରୀମାନଙ୍କୁ ନିଜ ଗାଁ’ର ଇତିହାସ, ସଂସ୍କୃତି ଓ ଜୀବନଶୈଳୀ ନିଜ ଭାଷାରେ ଲେଖିବା ପାଇଁ ଅନୁପ୍ରାଣିତ କରାଯାଏ ।

ଆମ ଲକ୍ଷ୍ୟ: ଯୁବକ – ଯୁବତୀ ଓ  ଛାତ୍ରଛାତ୍ରୀମାନେ ନିଜ ନିଜ ଗାଁରେ ବୟସ୍କ ଲୋକଙ୍କ ପାଖରେ ବସି ସେମାନଙ୍କର ଅତୀତର ସ୍ମୃତି ଓ ଲୋପ ପାଇବାକୁ ବସିଥିବା ବା ହଜି ହଜି ଯାଉଥିବା ଖାଦ୍ୟ, ଫସଲ, ଓ ପ୍ରାକୃତିକ ଜ୍ଞାନ କୌଶଳକୁ ନିଜ ମାତୃ ଭାଷାରେ ଲିପିବଦ୍ଧ କରିବେ । ଏହା ଫଳରେ ମାତୃ ଭାଷା ଓ ନିଜ ମାଟି ମା’କୁ ସେମାନେ ଚିହ୍ନିପାରିବେ । ସେମାନେ ନିଜ ଗାଁର ଅତୀତ, ବର୍ତ୍ତମାନର ସମ୍ବଳ, ପ୍ରକୃତିକ ପରିବେଶକୁ ଭଲକରି ଜାଣିବେ ଓ ବୁଝିବେ । ଏହାକୁ ସେମାନେ କେମିତି ସୁରକ୍ଷିତ କରିବେ ବା ସଂରକ୍ଷଣ କରିବେ ଏକାଠି ହୋଇ ସେଥିପାଇଁ ବାଟ ବାହାର କରିବେ । ସେମାନଙ୍କୁ ଗବେଷଣାତ୍ମକ ଲେଖା, ଅଡିଓ,  ଭିଡ଼ିଓ, ଓ ଡ଼ିଜିଟାଲ ମାଧ୍ୟମରେ ପ୍ରଶିକ୍ଷିତ କରି ସ୍ଥାନୀୟ ଜ୍ଞାନ ଜୀବନ୍ତ ରଖିବାପାଇଁ ପ୍ରୋତ୍ସାହିତ କରିବା ଏହି ଅଭିଯାନର ମୂଳ ଲକ୍ଷ୍ୟ ଓ ଉଦ୍ଦେଶ୍ୟ।

ଯୁବକ – ଯୁବତୀ ଓ  ଛାତ୍ରଛାତ୍ରୀଙ୍କ ଦ୍ୱାରା ରଚିତ ଗାଁ ଜୀବନ ଉପରେ ପ୍ରବନ୍ଧ, ଗଳ୍ପ, ବିରଳ ଶସ୍ୟ ଓ ଦେଶୀ ଖାଦ୍ୟର ବ୍ୟଞ୍ଜନ, ଗାଁର ପ୍ରକୃତିକ ପରିବେଶ, ସଂସ୍କୃତି, ଉତ୍ସବ ଓ ଲୋକ ସଙ୍ଗୀତ ସବୁ କିଛି ସଂଗ୍ରହ କରିବାପାଇଁ ଆମର ପ୍ରୟାସ । କୋଭିଡ ଲକ୍‌ଡାଉନ ସମୟରେ, ଯେତେବେଳେ ପିଲାମାନେ ଗାଁରେ ଘରେ ରହୁଥିଲେ, ଏହି ଅଭିଯାନ ଶହ ଶହ ପିଲାଙ୍କୁ ନିଜ ନିଜ ଗାଁ ଉପରେ ଗବେଷଣା କରିବା ପାଇଁ ପ୍ରୋତ୍ସାହିତ କରିଥିଲା । ଶିଶୁ, ଅଭିଭାବକ, ଓ ବୟୋଜ୍ୟେଷ୍ଠ, ସମସ୍ତେ ଏକାଠି ବସି ଗାଁ ଇତିହାସ ଖୋଜିଲେ ଓ ଲେଖିଲେ।

“ଆମ ଗାଁ ଆମ ଜୀବନ” କେବଳ ଏକ ଡ଼କ୍ୟୁମେଣ୍ଟ ଅଭିଯାନ ନୁହେଁ ବରଂ ଏକ ଜୀବନ୍ତ ଇତିହାସ, ଯାହା ଆମକୁ ସ୍ମରଣ କରାଏ, ଯେତେବେଳେ ଯୁବପିଢି ନିଜ ମୂଳକୁ ଲିପିବଦ୍ଧ କରନ୍ତି, ସେତେବେଳେ ସେମାନେ ଏକ ସମ୍ପୂର୍ଣ୍ଣ ସଂସ୍କୃତିର ଭବିଷ୍ୟତକୁ ସୁରକ୍ଷିତ କରନ୍ତି।