ଗାଁ ଇତିହାସ (ଆମ ଗାଁ ଆମ ଜୀବନ)

ଗାଁ ଇତିହାସ / ଆମ ଗାଁ ଆମ ଜୀବନ / Our Village, Our Life

‘ଗାଁ ଇତିହାସ’ / “ଆମ ଗାଁ ଆମ ଜୀବନ” କାର୍ଯ୍ୟକ୍ରମ ହେଉଛି ଗାଁର ଜୀବନ୍ତ ଇତିହାସ ସଂଗ୍ରହ କରିବା ଅଭିଯାନ। ସମଧ୍ଵନି ଦୀର୍ଘବର୍ଷ ଧରି ଗାଁର ଇତିହାସ ଓ ସଂସ୍କୃତି ଲିପିବଦ୍ଧ କାମ କରି ଆସୁଛି । ଏହି କାର୍ଯ୍ୟକ୍ରମ ମାଧ୍ୟମରେ ଯୁବକ – ଯୁବତୀ ଓ  ଛାତ୍ରଛାତ୍ରୀମାନଙ୍କୁ ନିଜ ଗାଁ’ର ଇତିହାସ, ସଂସ୍କୃତି ଓ ଜୀବନଶୈଳୀ ନିଜ ମାତୃ ଭାଷାରେ ଲେଖିବା ପାଇଁ ଅନୁପ୍ରାଣିତ କରାଯାଇଥାଏ । ଯୁବ ଛାତ୍ରଛାତ୍ରୀଙ୍କୁ ନେଇ ଏହି ଅଭିନବ କାର୍ଯ୍ୟକ୍ରମ ୧୯୯୦ ଦଶକରେ ଓଡିଶାରେ ଆରମ୍ଭ ହୋଇଥିଲା ।

କାର୍ଯ୍ୟକ୍ରମର ଲକ୍ଷ୍ୟ: ଯୁବକ – ଯୁବତୀ ଓ  ଛାତ୍ରଛାତ୍ରୀମାନେ ନିଜ ନିଜ ଗାଁରେ ବୟସ୍କ ଲୋକଙ୍କ ପାଖରେ ବସି ସେମାନଙ୍କର ଅତୀତର ସ୍ମୃତି ଓ ଲୋପ ପାଇବାକୁ ବସିଥିବା ବା ହଜି ହଜି ଯାଉଥିବା ଖାଦ୍ୟ, ଫସଲ, ଓ ପ୍ରାକୃତିକ ଜ୍ଞାନ କୌଶଳକୁ ନିଜ ମାତୃ ଭାଷାରେ ଲିପିବଦ୍ଧ କରିବେ । ଏହା ଫଳରେ ମାତୃ ଭାଷା ଓ ନିଜ ମାଟି ମା’କୁ ସେମାନେ ଚିହ୍ନିପାରିବେ । ସେମାନେ ନିଜ ଗାଁର ଅତୀତ, ବର୍ତ୍ତମାନର ସମ୍ବଳ, ପ୍ରକୃତିକ ପରିବେଶକୁ ଭଲକରି ଜାଣିବେ ଓ ବୁଝିବେ । ଏହାକୁ ସେମାନେ କେମିତି ସୁରକ୍ଷିତ କରିବେ ବା ସଂରକ୍ଷଣ କରିବେ ଏକାଠି ହୋଇ ସେଥିପାଇଁ ବାଟ ବାହାର କରିବେ । ସେମାନଙ୍କୁ ଗବେଷଣାତ୍ମକ ଲେଖା, ଅଡିଓ,  ଭିଡ଼ିଓ, ଓ ଡ଼ିଜିଟାଲ ମାଧ୍ୟମରେ ପ୍ରଶିକ୍ଷିତ କରି ସ୍ଥାନୀୟ ଜ୍ଞାନ ଜୀବନ୍ତ ରଖିବାପାଇଁ ପ୍ରୋତ୍ସାହିତ କରିବା ଏହି ଅଭିଯାନର ମୂଳ ଲକ୍ଷ୍ୟ ଓ ଉଦ୍ଦେଶ୍ୟ।

ଯୁବକ – ଯୁବତୀ ଓ  ଛାତ୍ରଛାତ୍ରୀଙ୍କ ଦ୍ୱାରା ରଚିତ ଗାଁ ଅତୀତ ଉପରେ ପ୍ରବନ୍ଧ, ଗଳ୍ପ, ବିରଳ ଶସ୍ୟ ଓ ଦେଶୀ ଖାଦ୍ୟର ବ୍ୟଞ୍ଜନ, ଗାଁର ପ୍ରକୃତିକ ପରିବେଶ, ସଂସ୍କୃତି, ଉତ୍ସବ ଓ ଲୋକ ସଙ୍ଗୀତ ସବୁ କିଛି ସଂଗ୍ରହ କରିବାପାଇଁ ଆମର ପ୍ରୟାସ । କୋଭିଡ-୧୯ ଲକ୍‌ଡାଉନ ସମୟରେ, ଯେତେବେଳେ ପିଲାମାନେ ଗାଁରେ ଘରେ ରହୁଥିଲେ, ଏହି ଅଭିଯାନ ଶହ ଶହ ପିଲାଙ୍କୁ ନିଜ ନିଜ ଗାଁ ଉପରେ ଗବେଷଣା କରିବା ପାଇଁ ପ୍ରୋତ୍ସାହିତ କରିଥିଲା । ଶିଶୁ, ଅଭିଭାବକ, ଓ ବୟୋଜ୍ୟେଷ୍ଠ, ସମସ୍ତେ ଏକାଠି ବସି ଗାଁ ଇତିହାସ ଖୋଜିଲେ ଓ ଲେଖିଲେ। କୋଭିଡ-୧୯ ପରେ ଏହି କାର୍ଯ୍ୟକ୍ରମରେ ଓଡ଼ିଶା ତଥା ଭାରତର ବିଭିନ୍ନ ଅଞ୍ଚଳର ଛାତ୍ରଛାତ୍ରୀମାନଙ୍କ ଭିତରେ ନିଜ ନିଜ ଗାଁ ଓ ନିଜ ସଂସ୍କୃତିକୁ ଲିପିବଦ୍ଧ କରିବାପାଇଁ ଉତ୍ସାହ ସୃଷ୍ଟି କରିଛି ।

‘ଗାଁ ଇତିହାସ’ / “ଆମ ଗାଁ ଆମ ଜୀବନ” କେବଳ ଏକ ଡ଼କ୍ୟୁମେଣ୍ଟ ଅଭିଯାନ ନୁହେଁ ବରଂ ଏକ ଜୀବନ୍ତ ଇତିହାସ ସଂଗ୍ରହ କରିବା ଅଭିଯାନ, ଯାହା ଆମକୁ ସ୍ମରଣ କରାଏ, ଯେତେବେଳେ ଯୁବପିଢି ନିଜ ଗାଁ କିମ୍ବା ନିଜ ଅଞ୍ଚଳ ବା ଗୋଷ୍ଠୀକୁ ଲିପିବଦ୍ଧ କରନ୍ତି, ସେତେବେଳେ ସେମାନେ ନିଜ ନିଜ ସଂସ୍କୃତିର ଭବିଷ୍ୟତକୁ ସୁରକ୍ଷିତ କରନ୍ତି।