Home / ସାହିତ୍ୟ ସଂସ୍କୃତି / ସାହିତ୍ୟ / ବାଲ୍ମୀକିଙ୍କୁ ପ୍ରଶ୍ନ

ବାଲ୍ମୀକିଙ୍କୁ ପ୍ରଶ୍ନ

Share Samadhwani

ତୁମେ ମୋତେ କାହିଁକି

କରିଲ ସୃଷ୍ଟି

ହେ! ଋଷି ବାଲ୍ମୀକି?

କାହିଁକି ଛଡାଇ ନେଲ

ମୋର ଅଧିକାର

ଇତିହାସ ଗର୍ଭରେ ବିଲୀନ ହେବାର?

ମୁଁ ସାଧାରଣ ରାଜା ଥିଲି

ବାପା, ମା ଥିଲେ, ମୋର ପିଲାପିଲି ଥିଲେ

କିଛି ଲଢିଛି ନିଶ୍ଚୟ

ମୋ ରାଜ୍ୟରେ ମୁଁ ହୁଏତ ସଭିଙ୍କୁ ସ୍ୱଚ୍ଛଳ କରିଛି

ସାଧାରଣ ରଜକର ସନ୍ଦେହରେ

ସ୍ତ୍ରୀକୁ ଛାଡିଛି

ସାଧାରଣ ଲୋକଙ୍କର ଗାରିମା ବୁଝିଛି ।

ଏ ସବୁ ଠିକ, ସବୁ ସତ୍ୟ

ତଥାପି କଣ ନାହିଁ ମୋର ଅଧିକାର

ଅଜଣା ଅଶୁଣା ହୋଇ ରହିଯିବାର ?

ଜବାବ ଦିଅ ବାଲ୍ମୀକି

କାହିଁକି ଛଡାଇ ନେଲ

ମୋର ଅଧିକାର

ଇତିହାସ ଗର୍ଭରେ ବିଲୀନ ହେବାର?

ମୁଁ ଯଦି ନ ଥାନ୍ତି ଆଜି

ଜନ ମାନସରେ

କାହାର ସୁଯୋଗ ଥାନ୍ତା

କରିବାକୁ ମୋତେ ହତିଆର?

କାହିଁକି ବହିଥାନ୍ତା

ରକ୍ତର ନଦୀ?

କାହିଁକି ଉଦବାସ୍ତୁ ହୋଇଥାନ୍ତେ

ନାଗରିକ, ଏତେ ନରନାରୀ?

ଲକ୍ଷ ଲକ୍ଷ ବାସଗୃହ ଭାଂଗି

କାହିଁକି ଖୋଜୁଥାନ୍ତେ ମୋର ଜନ୍ମଭୂମି

ଗଢୁଥାନ୍ତେ ମୋର ବାସଗୃହ?

ତୁମେ ମୋତେ ଦେଇଥିଲ ଖ୍ୟାତି

ମୁଁ ରାମ ରାଜ୍ୟ ଗଢିଛି

ଯେଉଁଠି ମଣିଷ ମୁକ୍ତ

ମୁକ୍ତ ତାର ସବୁ ଅଭିବ୍ୟକ୍ତି ।

ସେହି ରାମ ଆଜି ବନ୍ଦୀ

ତାହାରି ନାମରେ ଆଜି ଧ୍ୱଂସର ତାଣ୍ଡବ ।

ହେ ଋଷି ପ୍ରବର!

ସବୁ ଭଲ ଗୁଣ ନେସି ନେସି କରିଥିଲ

ଯେଉଁ ଚରିତ୍ର ଗଠନ

ତାକୁ ଗ୍ରାସିଛି କିପରି ଆଜି

ଏକ ସଇତାନ

କବଳିତ କରି ତାକୁ

ଛାଡିଛି ଅସହାୟ କରି;

ତାର ଆତ୍ମାରେ ଗୁଳି ଭେଦି

ତା ନାମକୁ ଅଫିମ କରିଛି ।

କୁହ ବାଲ୍ମୀକି

ଏବେ ତୁମକୁ କିପରି ଲାଗୁଛି?

(ରଚନା ୧୯୯୩)

Photo credit- https://bit.ly/2VlMcE5


Share Samadhwani
Support Samadhwani

About ପ୍ରଫେସର ବୀରେନ୍ଦ୍ର ନାୟକ

ଗଣିତ ବିଭାଗର ପ୍ରଫେସର, ଲେଖକ, ସମାଲୋଚକ, ସମାଜବିଜ୍ଞାନୀ

Check Also

କଥା ସାହିତ୍ୟର କୁହୁକ ପୁରୁଷ ଗାବ୍ରିଏଲ୍ ଗାର୍ସିଆ ମାକ୍ୱେର୍ଜ୍‌

Share Samadhwaniଆପଣ ଲେଖାଲେଖି ଆରମ୍ଭ କଲେ କେମିତି- ପ୍ରଶ୍ନଟିର ଉତ୍ତର କ’ଣ ଏତେ ସହଜ ହୋଇପାରେ? ମାକ୍ୱେର୍ଜ୍ କିନ୍ତୁ ଖୁବ୍ …