ଓଡ଼ିଶାରେ ସାମ୍ବାଦିକତା ଶିକ୍ଷାପାଇଁ ବ୍ୟୟ ବହୁଳ ଅନୁଷ୍ଠାନମାନ ଗଢ଼ି ଉଠିଛି । ଏହି ସମସ୍ତ ସ୍ଥାନରେ ସାମ୍ବାଦିକତା ଶିକ୍ଷା ଦିଆଯାଉଥିଲେ ବି ଓଡ଼ିଶାର ସଂସ୍କୃତିର ପ୍ରଚାର ଓ ପ୍ରସାର କ୍ଷେତ୍ରଟି ଆଜିଯାଏ ସଂକୁଚିତ ହୋଇ ରହିଛି । ସଂସ୍କୃତିକୁ ତୋଳି ଧରିବାରେ ସମସ୍ତଙ୍କର ଯୋଗଦାନ ରହିଲେ ଯାଇ ଏହାକୁ ଆଗକୁ ନେବା ସମ୍ଭବ । ଏହିଭଳି ଏକ ଚିନ୍ତା ଓ ଭାବନା ଭିତରୁ ସମଧ୍ୱନି ଦ୍ୱାରା ଏକ ସାଂସ୍କୃତିକ ସାମ୍ବାଦିକତା ସାର୍ଟିଫିକେଟ କୋର୍ସର ପରିକଳ୍ପନା କରାଯାଇଛି । ଏହି ସାଂସ୍କୃତିକ ସାମ୍ବାଦିକତା ସାର୍ଟିଫିକେଟ କୋର୍ସ ମାଧ୍ୟମରେ ଶିକ୍ଷାର୍ଥୀମାନେ ସାମ୍ବାଦିକତାର ସର୍ବନିମ୍ନ ଜ୍ଞାନ ଆହରଣ କରିବା ସହିତ ନିଜ ଗାଁ ଓ ନିଜ ଅଂଚଳର ଲୋକସଂସ୍କୃତି, ଇତିହାସ ଓ ସାହିତ୍ୟକୁ କେମିତି ପ୍ରଚାର ପ୍ରସାର କରିବେ ସେ ଦିଗରେ କିଛି ଶିକ୍ଷା ଗ୍ରହଣ କରିପାରିବେ ।
ଏହି ସମ୍ପର୍କରେ ଅଧିକ ଜାଣିବାପାଇଁ ଆମର ପାଠ୍ୟକ୍ରମକୁ ଅନୁଧ୍ୟାନ କରିବା ପାଇଁ ଅନୁରୋଧ ।
ଉଦ୍ଦେଶ୍ୟ :
ସାଂସ୍କୃତିକ ସାମ୍ବାଦିକତା ସାର୍ଟିଫିକେଟ ପ୍ରୋଗ୍ରାମର ପ୍ରାଥମିକ ଉଦ୍ଦେଶ୍ୟ ନିମ୍ନରେ ଉଲ୍ଲେଖ କରାଯାଇଛି :
କ) ସମ୍ବାଦ କେମିତି ସମାଜରେ ପରିବର୍ତ୍ତନ ଆଣିଥାଏ? ନିଜ ଗାଁକୁ ନିଜ ଅଂଚଳକୁ ନ ଜାଣି କିମ୍ବା ନବୁଝି ସାମ୍ବାଦିକତା ଶିକ୍ଷା କରାଯାଇ ପାରିବ ନାହିଁ। ସାଂସ୍କୃତିକ ସାମ୍ବାଦିକତାର ମୌଳିକ ପରିକଳ୍ପନା, ନିଜ ଅଂଚଳର ସଂସ୍କୃତିକୁ ଓ ସାଂସ୍କୃତିକ ପରିବେଶକୁ ବୁଝିବା ଓ ତାହାର ସୁରକ୍ଷା ପାଇଁ କିଛି ଲେଖି ଶିଖିବା ।
ଖ) ନିଜ ଅଂଚଳର ବିଭନ୍ନ ଲୋକ ସାଂସ୍କୃତିକ କାର୍ଯ୍ୟକ୍ରମ, ପର୍ବପର୍ବାଣୀ ଓ କଳାତ୍ମକ ପ୍ରୟାସ ପରିପ୍ରେକ୍ଷୀରେ ଛାତ୍ରଛାତ୍ରୀଙ୍କ ବୁଝାମଣା ସୃଷ୍ଟିକରିବା ଓ ସେମାନଙ୍କ ଭିତରେ ଗବେଷଣା, ସମାଲୋଚନାତ୍ମକ ବିଶ୍ଳେଷଣ ଓ ରିପୋର୍ଟିଂ ଦକ୍ଷତାର ବିକାଶ ପାଇଁ ପ୍ରୟାସ କରିବା ।
ଗ) ବିଭିନ୍ନ ସାଂସ୍କୃତିକ ଅଭିବ୍ୟକ୍ତିକୁ ଓ ବ୍ୟକ୍ତିତ୍ୱ ଙ୍କୁ ସାକ୍ଷାତକାର ଓ ନିବନ୍ଧ ମାଧ୍ୟମରେ ପ୍ରକାଶ କରିବା ।
ଯୋଗ୍ୟତା :
ସାଂସ୍କୃତିକ ସାମ୍ବାଦିକତା ପାଠ୍ୟକ୍ରମରେ ଯୋଗ ଦେବାପାଇଁ ଶିକ୍ଷା ଗ୍ରହଣରେ ଆଗ୍ରହ ରହିଥିବା ଆବଶ୍ୟକ ।
ନିଜ ଗାଁ ସମ୍ପର୍କରେ ଓ ନିଜ ଅଂଚଳର ସଂସ୍କୃତି ସମ୍ପର୍କରେ ଅଧିକ ଜାଣିବା ଓ ପ୍ରକାଶ କରିବାପାଇଁ ଇଛା ରହିବା ଜରୁରୀ ।
ଆବଶ୍ୟକତା :
1- ଏହି ପାଠ୍ୟକ୍ରମରେ ଯୋଗ ଦେବାପାଇଁ ପ୍ରଥମେ ନାମ ପଞ୍ଜିକରଣ (ରେଜିଷ୍ଟ୍ରେସନ) କରିବାପାଇଁ ପଡିଥାଏ । ଶେଷରେ ରେଜିଷ୍ଟ୍ରସନ ଫର୍ମ ଦିଆଯାଇଛି । (Registration Fee = Rs 50/- )
2- ରେଜିଷ୍ଟ୍ରେସନ କରିସାରିବା ପରେ ନିଜ ସମ୍ପର୍କରେ ଆବଶ୍ୟକୀୟ ତଥ୍ୟ ଗୁଗୁଲ ଫର୍ମରେ ପୁରଣ କରି ଦିଆଯାଇଥିବା ଇମେଲ (Email) କୁ ପଠାଇବାକୁ ହୁଏ।
3- ପାଠ୍ୟକ୍ରମରେ ଯୋଗ ଦେବାର ତିନି ମାସ ପରେ ଏକ ପରୀକ୍ଷାର ବ୍ୟବସ୍ଥା ରହିଛି (ଯେଉଁଥିରେ ଏକ ଲେଖା ପ୍ରସ୍ତୁତ କରିବା ପାଇଁ କୁହାଯାଏ), ଯେଉଁ ପରୀକ୍ଷା ସମସ୍ତଙ୍କ ପାଇଁ ବାଧ୍ୟତାମୂଳକ ଅଟେ । ଉତ୍ତୀର୍ଣ୍ଣ ଶିକ୍ଷାର୍ଥୀ ମାନଙ୍କୁ ସାର୍ଟିଫିକେଟ ପ୍ରଦାନ କରାଯାଇଥାଏ ।
ପାଠ୍ୟକ୍ରମ :
ସାଂସ୍କୃତିକ ସାମ୍ବାଦିକତା ସାର୍ଟିଫିକେଟ କୋର୍ସ, ଯେଉଁଥିରେ ସମ୍ବାଦ ସମ୍ପର୍କରେ ଜାଣିବା ସହିତ ସାକ୍ଷାତକାର ନେବାର ବ୍ୟବହାରିକ ପ୍ରଶିକ୍ଷଣ ଓ ସାମାଜିକ ଗଣମାଧ୍ୟମର ସଠିକ ବ୍ୟବହାର ଆଦି ଶିକ୍ଷାଦାନ କରାଯିବା ପାଇଁ ବ୍ୟବସ୍ଥା ରହିଛି ଯେମିତିକି;
କ) ସମ୍ବାଦ କ’ଣ ଓ କାହାକୁ ସମ୍ବାଦ କୁହାଯାଏ ? ଓଡ଼ିଶାରେ ସମ୍ବାଦ ପତ୍ରର ଇତିହାସ କ’ଣ ରହିଛି ? ସାମ୍ବାଦିକର ଭୂମିକା ଓ ତାତ୍ପର୍ଯ୍ୟକୁ ବୁଝିବା, ଏହାର ବର୍ତ୍ତମାନ ସମୟରେ ପ୍ରାସଙ୍ଗିକତାକୁ ଅନୁଧ୍ୟାନ କରିବା।
ଖ) ସଙ୍ଗୀତ, ନୃତ୍ୟ, ରଙ୍ଗମଞ୍ଚ, ସାହିତ୍ୟ, ଦୃଶ୍ୟକଳା ଏବଂ ସାଂସ୍କୃତିକ ସମ୍ବାଦ ସମେତ ବିବିଧ ସାଂସ୍କୃତିକ ଅଭିବ୍ୟକ୍ତି, ପରମ୍ପରା ଏବଂ କଳାକୁ କେମିତି ଉପସ୍ଥାପନା କରିବା ?
ଗ) ଗବେଷଣା ଓ ରିପୋର୍ଟିଂ କୌଶଳ : ନିଜ ଗାଁ’ର କଳା ଓ ସଂସ୍କୃତି ଉପରେ କିଛି ଗବେଷଣା, ସାକ୍ଷାତକାର ଏବଂ ବିଭିନ୍ନ ମିଡିଆ ପ୍ଲାଟଫର୍ମ ପାଇଁ ଆକର୍ଷଣୀୟ ସାଂସ୍କୃତିକ କାହାଣୀ ଲେଖିବାର ଦକ୍ଷତା ବିକଶିତ କରିବା।
ଉପସଂହାର:
ସାଂସ୍କୃତିକ ସାମ୍ବାଦିକତା ପାଠ୍ୟକ୍ରମର ଉଦ୍ଦେଶ୍ୟ ହେଉଛି ଆଗାମୀ ପିଢ଼ିର ସାମ୍ବାଦିକମାନଙ୍କୁ ସାଂସ୍କୃତିକ ବିବିଧତା ସହିତ ଜଡିତ କରିବା, ସେ ସମ୍ପର୍କରେ ଉପସ୍ଥାପନା କରିବା, ସାଂସ୍କୃତିକ ବାର୍ତ୍ତାଳାପକୁ ପ୍ରୋତ୍ସାହନ, ଏବଂ ସାଂସ୍କୃତିକ ଐତିହ୍ୟର ସଂରକ୍ଷଣରେ ଯୋଗଦାନ କରିବା। ସାଂସ୍କୃତିକ ସାମ୍ବାଦିକତା ପ୍ରତି ଆଗ୍ରହକୁ ପ୍ରୋତ୍ସାହନ ଦେଇ ଏକ ଜୀବନ୍ତ ସାଂସ୍କୃତିକ ସାମ୍ବାଦିକ ଗୋଷ୍ଠୀ ସୃଷ୍ଟି କରିପାରିବା ଯେଉଁମାନେ ଆମ ରାଜ୍ୟର କଳା ଓ ସଂସ୍କୃତିର ପ୍ରଚାର ପ୍ରସାର କରିବେ।