ମୁଁ କାହିଁକି କବି ହେଲି ନାହିିଁ: ବିଶ୍ୱ କବିତା ଦିବସ ଅବସରରେ

2 Min Read

ଭଲ ପଢୁଥିଲି

Support Samadhwani

କବିତା ଲେଖୁଥିଲି

ବାପା ମୋତେ ନେଇ

                ଦେଖୁଥିଲେ ଅନେକ ସପନ

Support Samadhwani

ଆଇ ଏ ଏସ୍ ହେବି

କବିତା ଲେଖିବି

ପୁରାସ୍କାର୍ ପାଇ

ପ୍ରତିଷ୍ଠିତ ହେବି

ଲକ୍ଷ୍ମୀ ଓ ସରସ୍ୱତୀ

ଦୁହିଁଙ୍କର ଗେହ୍ଲା ପୁଅ

ଆଉ ବିଷ୍ଣୁଙ୍କର ଦାୟାଦ ହୋଇବି ।

ମୁଁ ମନା କରିଛି, ବାପା

ଏ ଭଳି ସ୍ୱପ୍ନ ଦେଖ ନାହିଁ

ମତେ ତୁମ ସାଂଗ ସାଥୀଙ୍କର

ଓଠ ତଳ ଚୋରା ହସ

ଭଲ ଲାଗୁନାହିଁ ।

କିନ୍ତୁ ସେକ୍ରେଟାରିଏଟ ଅଫିସରୁ ଫେରି

ତାଙ୍କର ସେ ଅଭ୍ୟାସଟା ଛାଡନ୍ତେ କିପରି?

ଦୋହରାନ୍ତି, ଆଇ ଏ ଏସ୍ ଥରେ ହୋଇ ଯା

ଦେଖିବୁ, ତୋ କବିତାକୁ ଛାପିବାକୁ

ଲାଗିଯିବ ପ୍ରକାଶକଙ୍କ ଭିଡ

ପ୍ରଶଂସା କରିବାକୁ

ଜମିବ ଅଧ୍ୟାପକଙ୍କର ପଟୁଆର ବଡ

ସବୁ ଆସରରେ ତୋର ହୋଇବ ସତ୍କାର

ବାପା, ଥରେ ଆଇ ଏ ଏସ୍ ହୋଇଯା , ଦେଖିବୁ ।

ମୁଁ ଦେଖିଲି ବାପା ମୋର

ବଦଳିବେ ନାହିଁ

ଆଉ ମୁଁ ସ୍ଥିର କଲି

କବି ଆଉ ଆଇ ଏ ଏସ୍

ଏକା ସଂଗେ କେଭେଁ ହେବି ନାହିଁ ।

କିନ୍ତୁ ବାପାଙ୍କ ସ୍ୱପ୍ନକୁ ସାକାର କରିବି

ତେଣୁ ଆଇ ଏ ଏସ୍ ହେବି ।

ପ୍ରକାଶକ, ଅଧ୍ୟାପକ ଭିଡ

ଅବା କବିତା ଆସର ଠାରୁ

ଶହେ କୋଶ ଦୁରରେ ରହିବି

କବି ହେବି ନାହିଁ ।

ଆଇ ଏ ଏସ୍ ହେଲି

କବିତା ଲେଖିବା ଛାଡିଲି

କବିତା ମାଡିଲେ

ନିରୋଳାରେ ବସି କାଗଜ ଚିରିଲି

କଲମକୁ ଲୁଚାଇ ରଖିଲି

ସିନେମା ଦେଖିବାକୁ ଗଲି

ଦୀର୍ଘ ପଥ ଚାଲିବାର ଅଭ୍ୟାସ କରିଲି ।

ବାପା ବହୁ ଦିନୁ ଗଲେଣି ଆମକୁ ଛାଡି

ସେ ପାରିକୁ

ଦେଖିକି ସେ ଗଲେ

ମୁଁ ଆଇ ଏ ଏସ୍ ହୋଇଗଲା ପରେ ।

ଯେତେ ଦିନ ବଂଚିଥିଲେ

ମୋ ପାଖରେ ରହୁଥିଲେ

ମୁଁ ବୁଝୁଥିଲି

ତାଙ୍କ ଆଖି କହୁଥିଲା

ଅମାନିଆ ପିଲା

ଆଇ ଏ ଏସ୍ ହେଲୁ

କବିତା ଲେଖିବା ତୁ ବନ୍ଦ କରିଲୁ

ଏତେ ଏତେ ପୁରସ୍କାର

ସବୁଥିରୁ ନିଜକୁ ବଂଚିତ କରିଲୁ

ଅବସର ନେବୁ

ତା ପରେ ତତେ କିଏ ବା ଚିହ୍ନିବ?

ଇତିହାସରେ ରହିବାର ସୁଯୋଗକୁ

ତୁ ହାତ ଛଡା କଲୁ?

ଏ ଗୁଡିକ ଶବ୍ଦ ହୋଇ

ମୋ କାନରେ ବାଜି ନାହିଁ କେଭେଁ ।

ତଥାପି ଚାହାଣିର ଭାଷାକୁ ମୁଁ ବେଶ ବୁଝୁଛି

ଆଉ ମୋ ଚାହାଣିରେ ଫେରାଇଛି

ବାପାଙ୍କୁ ସମ୍ବାଦ –

ନିଷ୍ପତ୍ତି ମୁଁ ସଠିକ ଦେଇଛି ।

ଆଜି ଅବସର ପରେ

ନାତି, ନାତୁଣିଙ୍କ କୋଳହାଳ

କନ୍ଦଳ ଭିତରେ

ମୁଁ ବେଶ ଭଲରେ ରହିଛି

କବିର ପ୍ରତିଷ୍ଠା ପାଇଁ

କ୍ଷମତାର ଆସରା ନେଇନି

ଏହା ଭାବି ସନ୍ତୋଷ ପାଉଛି ।

(ଏପ୍ରିଲ ୨୦୦୩)

Share this Article
ଗଣିତ ବିଭାଗର ପ୍ରଫେସର, ଲେଖକ, ସମାଲୋଚକ, ସମାଜବିଜ୍ଞାନୀ